დაიბადა 1961 წლის 17 დეკემბერი ქალაქი ფოთი გარდ. თებერვალი 2021წ
1988-1989 წლები მთიანი ყარაბაღი, 1990-1991 ცხინვალის რეგიონი პერიოდულად, 1993 აფხაზეთი ოჩამჩირე
საქართველოს ვეტერანთა ცენტრალური კავშირის ფოთის საქალაქო კავშირის გამგეობა და წევრები ღრმა მწუხარებით იუწყებიან, რომ ფოთელ ვეტერანთა ერთობამ უდიდესი დანაკლისი განიცადა - 59 წლის ასაკში ხანმოკლე მძიმე ავადმყოფობის შემდეგ გარდაიცვალა საქართველოს დამოუკიდებლობის, თავისუფლებისა და ტერიტორიული მთლიანობისათვის წარმოებული საბრძოლო მოქმედებების აქტიური მონაწილე, შინაგან საქმეთა ორგანოების ღირსეული ვეტერანი, ქალაქ ფოთის საპატიო მოქალაქე, პოლიციის მაიორი თადარიგში ბატონი ბესარიონ ვაჟას ძე დოლბაია.
ნაადრევად დამთავრდა ცხოვრება მრავალ ჭირ-ვარამ გამოვლილი ქართველი ვაჟკაცისა, რომელიც ერთგულად ემსახურებოდა თავის სამშობლოს და მშობელ ხალხს, ღირსეულად ატარებდა ქართველი ოფიცრის მუნდირს.
მძიმე იყო ხვედრი ჩვენი ბესოს და მისი თაობის ვაჟკაცებისა, ვინც 80-იანი წლების ბოლოს ქვეყნის სამსახურში პოლიციის აკადემიის კურსანტების ფორმაში გამოწყობილებმა თავიანთი მხრებით ზიდეს ის განსაცდელი - ბრძოლა აღვირახსნილი სეპარატიზმის წინააღმდეგ საქართველოს დამოუკიდებლობისათვის, თავისუფლებისა და ტერიტორიული მთლიანობისათვის, რასაც ბევრი მისი თანამებრძოლის სიცოცხლე შეეწირა.
პოლიციის აკადემიის დამთავრების შემდეგ სრულიად ახლაგაზრდა ოფიცერს მოუწია ჩართულიყო სამართალდამცველთა აქტიურ საქმიანობაში ქვეყანაში სამართლიანობისა და კანონიერების აღდგენის და მართლწესრიგის დამკვიდრებისათვის საბრძოლველად, რა დროსაც ბესარიონ დოლბაიამ პირუთვნელად დაიმკვიდრა უღალატო მეგობრის, პროფესიონალი პოლიციელის და ღირსეული ოფიცრის სახელი.
რომ არა უსაზღვრო და უკიდეგანო არაერთგზის განსაცდელი და ტკივილი კიდევ ბევრი სახელოვანი საქმეების კეთებას შეძლებდა ქვეყნის ღირსეული სამართალდამცავი, თუმცა მიუხედავად ფიზიკური განსაცდელისა, თადარიგში გასვლის შემდეგაც ის ფაზის ქალაქის ცხოვრებით ცხოვრობდა და მისი ჭირ-ვარამი აწუხებდა. ის იყო ვეტერანთა საქალაქო ორგანიზაციის ერთ-ერთი დამფუძნებელი და აქტიური წევრი, ფაზისის საერო-სამეცნიერო აკადემიის წევრი, მისი პირუთვნელი და სამართლიანი მოქალაქეობრივი პოზიცია არაერთხელ იყო გამოხატული მის საგაზეთო პუბლიკაციებში და სატელევიზიო გამოსვლებში. რის გამოც მისმა უსაყვარლესმა ფაზის ქალაქელებმა ღირსეულად აირჩიეს ქალაქ ფოთის საპატიო მოქალაქედ.
