დავით ჩალაური დაიბადა 1971 წლის 19 ნოემბერს მცხეთის რაიონის სოფელ საგურამოში.
წარჩინებით დაამთავრა ილია ჭავჭავაძის სახელობის საგურამოს საშუალო სკოლა.
დათო პატარაობიდანვე გამოირჩეოდა თანატოლებისგან საზრიანობით, ზრდილობით, ერთგულებით. მას ყველა უყვარდა, საკუთარ წილ სითბოს დაუშურებლად უნაწილებდა ახლობლებსა და მეგობრებს. სკოლის პერიოდში აქტიურად იყო ჩაბმული სამეცნიერო კონფერენციებში, იტაცებდა სპორტი. მისი გუნდი ყოველთვის გამარჯვებული გამოდიოდა.
როცა საქართველოს ტერიტორიულ მთლიანობას საფრთხე დაემუქრა, დათო დაუფიქრებლად, მოხალისედ ჩაეწერა ეროვნულ გვარდიაში. იგი ირიცხებოდა ორხევის საინჟინრო ბატალიონში რიგითად. თანამებრძოლები სიამაყით ჰყვებიან მის ვაჟკაცობაზე. 22 წლის გმირმა ვერ მოასწრო დაქორწინება, სამაგიეროდ მოასწრო კაცური კვალის დატოვება და სამშობლოსთვის სიკვდილი.
1993 წლის 9 ივლისს შრომა-ახალსოფლის მიდამოებში გამართულ სამკვდრო-სასიცოცხლო, უთანასწორო ბრძოლაში დაეცა ბრძოლის ველზე.
