გია ხარებავა
1993 წლის 5 ივლისი, ტამიში.
24-ე ბრიგადის სადაზვერვო ასეულის მეთაურმა განსაკუთრებული დავალება მიიღო: უნდა დაზუსტებულიყო ტამიშის ზონაში მტრის ძალთა განლაგება. ამ დავალების შესრულებას შემდგომში საომარი მოქმედების განვითარებისთვის დიდი მნიშვნელობა ჰქონდა.
თავად ბრიგადის სადაზვერვო ასეულის მეთაური გია ხარებავა ჩაუდგა სათავეში მზვერავთა ჯგუფს. დავალების შესრულებისას მოულოდნელად მტერმა საომარი მოქმედება განაახლა.
მზვერავთა ჯგუფმა, მამაცი მეთაურის ხელმძღვანელობით თავისთავზე მიიღო მტრის ცეცხლი, ამით ქვეგანაყოფს საშუალება მისცა ერთ-ერთი გამაგრებული პუნქტის „ტურბაზისაკენ“ გაჭრილიყო.
სადაზვერვო ჯგუფმა ცეცხლი მანამ არ შეანელა, სანამ „ტურბაზა“ დიდი გმირობის ფასად არ დაიპყრო.
მაგრამ ვაი, რომ ამ საბრძოლო ოპერაციაში გმირულად დაეცა ასეულის მეთაური გია ხარებავა.
თანამებრძოლებმა, როგორც ეკადრებოდა, ისე მიაბარეს მშობლიურ მიწას მამაცი მეთაური, საბრძოლო ჯილდო – ვახტანგ გორგასლის II ხარისხის ორდენი – კი სიკვდილის შემდეგ გადაეცა მის ახლობლებს.
