მგალობელისა და მღვდლის ფილიმონ კარბელაშვილის დაბადების თარიღად მითითებულია 1836 წ. (გვ. 39). სინამდვილეში, ფილიმონ კარბელაშვილი დაიბადა 1837 წლის 8 დეკემბერს. უხეში შეცდომაა დაშვებული ასევე მისი გარდაცვალების თარიღთან დაკავშირებით. წიგნის მიხედვით (გვ. 36, 46), ფილიმონ კარბელაშვილი თურმე გარდაცვლილა 1879 წელს. სამთავისის საეკლესიო მეტრიკული ჩანაწერის მიხედვით კი ის გარდაიცვალა 1869 წლის 10 ნოემბერს. საინტერესო ის არის, რომ თვით საფლავის ქვაზეც გარდაცვალების თარიღად მითითებულია ჩყჲთ წელი, რაც ნიშნავს 1869 წელს. 

წიგნში (გვ. 41) წერია, რომ მამა ფილიმონს სამთავისის ტაძარში თურმე უმსახურია 1869-1879 წლებში, რაც ასევე არასწორია. ფილიმონ კარბელაშვილი სამთავისის ტაძრის მღვდლად მსახურობდა 1859-1869 წლებში. პარალელურად ის 1864-1869 წლებში იყო სოფ. ქვემო ჭალის ღვთისმშობლის შობის ეკლესიის მღვდელი.

შეცდომით არის ასევე მითითებული (გვ. 46) ფილიმონის ვაჟის, გიორგის დაბადების წელიც - 1863 წ. ქვემო ჭალის ღვთისმშობლის მიძინების ეკლესიის საეკლესიო ჩანაწერის მიხედვით, გიორგი ფილიმონის ძე კარბელაშვილი დაიბადა 1868 წლის 16 სექტემბერს.