მღვდელი გიორგი ღვინიაშვილი 1867-1908

მღვდელი გიორგი ილიას ძე ღვინიაშვილი 1867 წელს, მედავითნის ოჯახში დაიბადა. 1887 წელს თბილისის სასულიერო სემინარიაში ჩააბარა. 1891 წელს, IV კურსიდან, თავისი თხოვნის საფუძველზე, გათავისუფლდა სასწავლებლიდან და საქართველოს ეგზარქოსმა პალადიმ (რაევი) იმავე წლის 3 მარტს დიაკვნად, ხოლო 9 მარტს — მღვდლად დაასხა ხელი და ახიელის მთავარანგელოზთა სახელობის ეკლესიის წინამძღვრად განამწესა. 1892 წლის 4 მარტს ქისტაურის წმინდა ნინოს სახელობის ეკლესიაში დაინიშნა.

1897 წლის 29 ივლისს შიბლიანის ყოვლადწმიდა ღვთისმშობლის მიძინების სახელობის ეკლესიაში გადაიყვანეს. 1899 წლის 14 იანვარს მაშნაარის ყოვლადწმიდა სამების სახელობის ეკლესიის წინამძღვრად და ამავე სოფლის სამრევლო-საეკლესიო სკოლის საღვთო სჯულის მასწავლებლად დაადგინეს. მასვე მიენდო სიღნაღის მაზრის I და II ოლქების ბიბლიოთეკარის თანამდებობა. 1901 წელს სიღნაღის წმინდა მარინეს სახელობის სასწავლებელში გალობის მასწავლებლად დაინიშნა და საგვერდულით დაჯილდოვდა. 1905 წლის აღდგომას, წმინდა სინოდის ბრძანების საფუძველზე, სკუფიით დაჯილდოვდა. მღვდელი გიორგი 1908 წლის 2 აგვისტოს გარდაიცვალა. ჰყავდა მეუღლე — ნადეჟდა რაფაელის ასული, დაბადებული 1871 წელს და ერთი ვაჟი ირაკლი, დაბადებული 1900 წელს. მის ოჯახს, სახელმწიფო ხაზინიდან დაენიშნა პენსია 133 მანეთის ოდენობით. ფოტო მოგვაწოდა მამა გიორგის შვილთაშვილმა, თბილისის სასულიერო სემინარიის კურსდამთავრებულმა, გიორგ ღვინიაშვილმა.