დეკანოზი ფილიპე ფხაკაძე

დეკანოზი ფილიპე ოქროპირის ძე ფხაკაძე 1844 წელს ქუთაისის გუბერნიის სოფელ ფარცხანაყანებში, გლეხის ოჯახში დაიბადა. დაამთავრა თბილისის სასულიერო სემინარია. მისი მეუღლე იყო პელაგია სიმონის ასული გრიგორიევა, თბილისის მამა-დავითის ფერისც- ვალების სახელობის ტაძრის განმაახლებლის მღვდელ თომა გრიგორიევის (შემდგომში მღვდელმონაზონი ფილოთეოსი) შთამომავალი, რომელთანაც მას სამი შვილი შეეძინა. სემინარიის დამთავრების შემდეგ იმერეთის ეპისკოპოსმა გაბრიელმა (ქიქოძე) ფილიპეს ხელი დაასხა ჯერ დიაკვნად, შემდეგ კი მღვდლად. მალე იგი გაიწვიეს რუსეთ-თურქეთის 1877-78 წლების ომში სამხედრო მღვდლად. ომის დამთავრების შემდეგ იგი დაინიშნა თავის მშობლიური სოფლის, ფარცხანაყანების წმ. გიორგის სახელობის ეკლესიის წინამძღვრად. ეს ეკლესია იყო ძველი, ხით აშენებული, მამა ფილიპეს მოთავეობით კი ახალი ქვის ეკლესია აიგო. 1880-იან წლებში დაჯილდოვდა საგვერდულითა და სკუფიით. მამა ფილიპეს თაოსნობითვე სოფელში სამრევლო-საეკლესიო სკოლა დაარსდა, სადაც თვითონვე ასწავლიდა. 1890 წლის 6 მაისს დაჯილდოვდა კამილავკით. 1892-93 წლებში დაინიშნა ქუთაისის მთავარანგელოზთა ტაძრის მღვდელმსახურად. 1894 წლის 6 მაისს დაჯილდოვდა სამკერდე ოქროს ჯვრით, ხოლო 1900 წლის 6 მაისს მიენიჭა დეკანოზის წოდება. 1914 წელს დაჯილდოვდა წმ. ვლადიმერის IV ხარისხის ორდენით. 1921 წელს ქუთათელმა მიტროპოლიტმა ნაზარიმ (ლეჟავა) ეკლესიაში ერთგული და ხანგრძლივი მოღვაწეობისათვის მიტრით დააჯილდოვდა. გარდაიცვალა 1922 წელს, 78 წლის ასაკში. მან ანდერძით ფარცხანაყანების წმ. გიორგის ეკლესიაში დასაფლავება ითხოვა, მაგრამ იგი ქუთაისის მთავარანგელოზთა ეკლესიაში დაასაფლავეს. II მსოფლიო ომის დროს კომუნისტებმა ქუთაისის მთავარანგელოზთა ეკლესია დაანგრიეს, რის გამოც შთამომავლებმა მამა ფილიპეს ნეშტი თავის მშობლიურ სოფელში გადაასვენეს და ფარცხანაყანევის წმ. გიორგის ეკლესიის· გალავანში დაასაფლავეს, რითაც აღსრულდა მისი ანდერძი. ბიოგრაფიული ცნობები მოგვაწოდა ნანა ლეჟავამ, ფოტო კი - ანჩისხატის ტაძრის მღვდელმსახურმა ირაკლი ოთხმეზურმა.