ამბაკუმი (შალვა) სანიკიძე დაიბადა 23 თებერვალი 1953 წელს სენაკში, გარდაიცვალა 23 ნოემბერს 2005წ.

დაბადების ადგილი: ქ. სენაკი.

დაამთავრა თბილისის პოლიტექნიკური ინსტიტუტის ინჟინერიის ფაკულტეტი.

სწავლის პარალელურად მუშაობდა სხვადასხვა სამუშაოებზე; გარკვეული პერიოდი მუშაობდა თბილისის სატრანსპორტო სამინისტროში; ინსტიტუტის დასრულების შემდეგ მშობლიურ ქალაქს დაუბრუნდა, სადაც სოფელ ნოსირის რკინაბეტონის კონსტრუქციების კომბინატში დასაქმდა ჯერ ოსტატის, შემდეგ კი მთავარი ინჟინრის თანამდებობაზე. ძალიან მალე კი კომბინატის დირექტორად დაინიშნა; შვილის ტრაგიკული დაღუპვის (1998 წლის 23 იანვარი) შემდეგ, მისი სახელის უკვდავსაყოფად, 1998 წლის გაზაფხულზე ქ. სენაკში იოანე ნათლისმცემლის სახელობის ტაძრის მშენებლობას ჩაუდგა სათავეში; 2001 წლის 22 ოქტომბერს კი ტაძარი საზეიმოდ გაიხსნა; 2002 წლის 14 მარტს უწმიდესისა და უნეტარესის, სრულიად საქართველოს კათოლიკოს-პატრიარქის, ილია II-ის ლოცვა-კურთხევით ყოვლადწმიდა სამების მშენებარე ტაძართან არსებული მამათა მონასტრის წინამძღვარმა, მღვდელმონაზონმა დოროთემ (ყურაშვილი) ერისკაცი შალვა სანიკიძე ბერად აღკვეცა და ამბაკუმ წინასწარმეტყველის სახელი უწოდა; იმავე წლის 20 ივნისს უწმიდესმა და უნეტარესმა, სრულიად საქართველოს კათოლიკოს-პატრიარქმა ილია II სიონის საპატრიარქო ტაძარში დიაკვნად დაასხა ხელი; ბერად აღკვეციდან ექვსი თვის შემდეგ სიონის საკათედრო ტაძარში ბერდიაკვნად აკურთხეს; ხოლო 2004 წლის 21 სექტემბერს, სრულიად საქართველოს კათოლიკოს-პატრიარქის, ილია II-ის მიერ, დიდუბის ღვთისმშობლის შობის სახელობის ეკლესიაში, ხელდასხმულ იქნა მღვდელმონაზვნად და საგურამოს წმინდა ილია მართლის სახელობის მამათა მონასტრის პირველ წინამძღვრად დაინიშნა.

ორგანიზაციის, ასოციაციის ან ჯგუფის წევრი; ქალაქ სენაკის მართლმადიდებელ ქრისტიანთა კავშირი "მეოხი", თავმჯდომარე (1998-2001)

საპატრიარქოს უწყებანი N12 1-7აპრილი 2004წ გვ.5

ბერად აღკვეცა

14 მარტს უწმიდესისა და უნეტარესის, სრულიად საქართველოს კათოლიკოს-პატრიარქის, ილია II ლოცვა-კურთხევით ყოვლადწმიდა სამების მშენებარე ტაძართან არსებული მამათა მონასტრის წინამძღვარმა, მღვდელმონაზონმა დოროთემ (ყურაშვილი) ბერად აღკვეცა მორ-ჩილები – შალვა საწუიძე და მას ამბაკუმ წინასწარმეტყველის სახელი უწოდა და ჯაბა ქირია, რომელსაც საბა განწმედილის სახელი უწოდა.

საპატრიარქოს უწყებანი  N23 25 ივნისი-1ივლისი 2004წ გვ.4

ხელდასხმა

20 ივნისს უწმიდესმა და უნეტარესმა, სრულიად საქართველოს კათოლიკოს-პატრიარქმა ილია II სიონის საპატრიარქო ტაძარში თბილისის ყოვლადწმიდა სამების მონასტრის ბერდიაკვანს, ილია თოლორაიას მღვდლად და ბერ ამბაკო სანიკიძეს დიაკვნად დაასხა ხელი.

კომენტარიდან. უნიკალური კადრებია... ჯერ კიდევ, ერისკაცი იყო შალვა სანიკიძე , შვილი რომ მოუკლეს.. შეუნდო და აპატია მკვლელს თუ მკვლელებს.. შემდეგ ქალაქ სენაკში საკათედრო ტაძარი ააშენა, ყოველ შემთხვევაში დიდი როლი მიუძღვის მის მშენებლობაში.. ბოლოს კი აღიკვეცა ბერად ! მსგავსი ისტორიები, მხოლოს წმიდა მამათა ცხოვრებაში თუ წამიკითხავს... ჭეშმარიტი ქრისტიანი გახლდათ მამა ამბაკუმი.

საფლავის ფოტო ფოტო მოგვაწოდა მამა ევაგრე ქავთარაძემ.

კუპრეიშვილი იოანე  მღვდელი, სენაკის და ჩხოროწყუს  ეპარქია, მოსახსენებელი 2008წ. გვ.51

საპატრიარქოს უწყებანი N28 1-8 ოქტომბერი 2009წ გვ.10

დაჯილდოება

20 სექტემბერს სენაკის წმინდა იოანე ნათლისმცემლის სახელობის საკათედრო ტაძარში, სრულიად საქართველოს კათოლიკოს-პატრიარქმა, უწმინდესმა და უნეტარესმა ილია II-მ სენაკისა და ჩხოროწყუს ეპისკოპოს შიოს (მუჯირი) მიანიჭა მთავარეპისკოპოსის წოდება. აქვე დააჯილდოვა სენაკისა და ჩხოროწყუს ეპარქიის სამღვდელოებაც: ოქროს ჯვრითა და დეკანოზის წოდებით — სენაკის წმინდა იოანე ნათლისმცემლის სახელობის საკათედრო ეკლესიის წინამძღვარი, მღვდელი იოსებ ესაკია, ჩხოროწყუს წმინდა გიორგის სახელობის ეკლესიის წინამძღვარი, მღვდელი ალექსანდრე თოლორდავა, ძველი სენაკის ყოვლადწმინდა ღვთისმშობლის მიძინების სახელობის ეკლესიის წინამძღვარი, მღვდელი იოანე კუპრეიშვილი და ნოქალაქევის წმინდა ორმოცი სებასტიელის სახელობის ეკლესიის წინამძღვარი, მღვდელი პავლე ესებუა.